UNICEF Comité Galicia concedeu este martes 19 de setembro a distinción de “Amiga” á escritora e xornalista María Solar “pola súa longa e continuada traxectoria de apoio aos dereitos da infancia”. Na emotiva xornada, celebrada na Biblioteca Anxel Casal de Santiago, participaron ademais da homenaxeada, a Presidenta de UNICEF Comité Galicia, Myriam Garabito, e a Coordinadora Autonómica, Irene Marín.
UNICEF destaca o apoio da autora en fitos como o libro “Contaxio” escrito para UNICEF por Ledicia Costas, Fran Alonso e María Solar durante a pandemia; a participación na presentación do informe “Impacto da Tecnoloxía na Adolescencia en Galicia. Relacións, Riscos e Oportunidades”; a colaboración con motivo do 75 aniversario do nacemento de UNICEF e dos 60 anos de historia de UNICEF España, no libro “UNICEF – 75 anos defendiendo los derechos de la infancia” xunto con 48 escritores, pintores, fotógrafos, ilustradores, xornalistas e intelectuais; ou o programa Zigzag da TVG realizado por nenos no marco da XII Semana coa Infancia da CRTVG e UNICEF España.
UNICEF traballa nalgúns dos lugares máis difíciles para chegar aos nenos e nenas máis desfavorecidos do mundo de 190 países e territorios. María Solar agradeceu a honra de recibir este prestixioso nomeamento de Amiga de UNICEF Comité Galicia.
